2 Prill 2002 – Çfarë shkruante “Gazeta Shqiptare” dy dekada më parë
Seriali vazhdon, gjithë detajet e vrasjes së Erald Hashorvës
Ekzekutim në emër të Rrugës së Kavajës
Nëntë plumba të një automatiku “Scorpion” me silenciator i kanë marrë jetën 26-vjeçarit në qendër të Tiranës. Hetuesit e lidhin ngjarjen me larjen e hesapeve mes djemve të “Rrugës së Kavajës”.
Policia: Kishte precedentë penal, vjet e arrestuam disa herë.
Rrëfimi i dëshmitarëve në vendngjarje dhe fqinjëve të viktimës
Rrëfimi i rojës së parkingut
“Eraldin e takova një ditë më parë”
Në fillim të rrugicës, ku banon familja Hashorva, pasditen e djeshme është vetëm një furgon i ndaluar që pret të mbushet me pasagjerët e fundit, disa djem të rinj që i shmangen çdo pyetjeje dhe pak dyqane që kanë mbetur akoma hapur. Kalimtarët janë shumë të rrallë. Me sytë që i drejton për nga fundi i rrugicës një djalë i ri na thotë se shtëpia është poshtë tabelës së “basteve”. Kaq. Askush nuk di të thotë, apo nuk do që të thotë më shumë. Mbyllin me shpejtësi dyert e lokaleve, apo thjeshtë shpejtojnë hapat për në “punën” e tyre…
“Dje e takova eraldin, sot u bë për rahmet”. Këto kanë qenë fjalët e para të të vetmit njeri që pranoi se e njihte dhe se komunikonte me 26-vjeçarin. Roja i një parkingu pranë shtëpisë së familjes Hashorva, ka treguar pasditen e djeshme për Gazetën, se e kishte takuar një ditë më parë Eraldin, për të cilin thoshte se ishte një djalë i sjellshëm. Një ditë më parë, njeriu të cilin dje e ekzekutuan në një mënyrë që është pak për të thënë profesionale, disa netë më parë i kishin vjedhur kasetofonin e makinës së tij brenda oborrit të shtëpisë. Nuk e dinte saktë se kush kishte dalë nga burgu. Nga dera gjysmë e hapur e oborrit të shtëpisë së familjes Hashorva, duket se shtëpia është e shkretë. Në derën prej hekuri është e vënë një copë e vogël letre ku me një shkrim të kujdesshëm dore lajmërohen njerëzit, të afërmit se “Besniku dhe Shkëndija (prindërit) presin te Bardhi”. E çuditshme, por siç na shpjegoi roja e parkingut, megjithëse kjo familje kishte si pronë gjithë vilën dykatëshe, ajo banonte vetëm në një dhomë, pjesa tjetër banohej nga qirazhinj, që nuk dilnin nga shtëpia. “Janë të dy mjekë” – na shpjegon roja. “Besniku, i cili është me origjinë nga Gjirokastra është mjek, ndërsa Shkëndija është dentiste. Eraldi më duket se kishte mbaruar edhe ai një shkollë të lartë”. Të kontaktosh me të afërmit e Eraldit dje ishte e pamundur…
Policia e kishte informuar Prokurorinë: Djali është në rrezik
Ishte liruar një muaj më parë nga burgu
Bilbil Mema: Një pjesë të fajit e ka Drejtësia
Gjenerali Bilbil Mema, drejtor i përgjithshëm i Policisë së Shtetit, thotë për “Gazetën Shqiptare”, se për vrasjen e bujshme të ndodhur dje në Tiranë, “ka faj edhe Drejtësia”. Sipas Njëshit të Policisë Shqiptare, Erald Hashorva është kapur nga policia në tetor të vitit të kaluar dhe vetëm 1 muaj më parë është liruar. Gjeneral Mema shpreh shqetësimin për mënyrën sesi “katandisen” dosjet e policisë në prokurori e gjykatë për ngjarje të rënda që bëjnë pjesë në serialë të krimit të organizuar. Eshtë e vërtetë që Eraldi është akuzuar për armëmbajtje pa leje dhe është dënuar për të njëjtën gjë, por ai në dosjet hetimore rezulton në zinxhirin e vrasjeve 5-vjeçare të historisë më tragjike të luftës së klaneve të drogës në Shqipëri. Ndoshta është rastësor në këtë “zinxhir” që ka marrë jetën e më shumë se 40 njerëzve të lidhur direkt apo si “viktima” të këtij “seriali kiler”. Bëhet fjalë për dosjen e djemve të Rrugës së Kavajës. Të gjithë ish-shokë dhe kushërinj, ishin rritur bashkë, nisën “të bëjnë pare bashkë”, por, pas prishjes së pazareve 5 vjet më parë, gjatë këtyre viteve ekzekutuan njëri-tjetrin në mënyra të sofistikuara dhe të bujshme… gjithsesi, në vrasjen e djaloshit 25 vjeçar, Erald Hashorva, ka një enigmë… Përse u lirua një muaj më parë?! Përderisa policia me dosjet e saj kishte “informuar” prokurorinë dhe kjo e fundit gjykatën për faktet se Hashorva ishte person i rrezikuar në çështjen “Djemtë e Rrugës së Kavajës”, duket se 25-vjeçari është nxjerrë nga burgu për t’u vrarë. Këtë hipotezë nuk e pohon asnjë nga krerët e policisë së Tiranës, por duke “akuzuar” drejtësinë, policia këtë herë i kërkon fajtorët “ e një vrasjeje të paralajmëruar” (ashtu si ka ndodhur edhe herë të tjera) te Gjykata.
